Berreskurapen funtzionala ingurune komunitarioan: inklusio sozialaren alde

Ospitaleko Egonaldi Ertaineko Unitatetik (EEU) “egunerokotasuneko trebetasunak” lantzera zuzentzen dugun lanaren helburu nagusia da eguneroko bizitzako ekintzak ikastea, oinarrizkoak zein instrumentalak, pazienteek hainbat motiborengatik ez dakitelako ekintza horiek egiten, edo gaixotasun mentalaren ondorioz galdu egin direlako; gainera, oraindik kontserbatzen diren trebetasunak mantentzen laguntzea da xedea. Horrenbestez, azken helburu gisa, lortu nahi da gure pazienteek ikasitako edo berrikasitako trebetasun horiek ‘mekanizatzea’, eta eguneroko bizimodura estrapolatzeko gai izatea, autonomia handiagoa lortu dezaten.

Programaren oinarriz funtsezko bi premisa daude:etxeko zereginak lantzea eta komunitatearen eta denbora libre eta aisialdiko baliabideak kudeatzea sustatzea.  Etxeko lanak hainbat saioren bitartez lantzen dira, eta hor zenbait jarraibide ematen dira etxea kudeatzeari dagokionez, zeinak Unitatearen barruan jartzen diren praktikan (logela eta komunen ordena eta garbitasuna, jangeletan mahaiak prestatu eta jaso, erosketen zerrenda egin, errezeta eta menuak prestatu…).

Xedea da alderdi teorikoak praktikara eramatea, elkarbizitza hobetzeko eta zereginak planifikatzen eta egiten ikasteko. Programaren lehen premisa moduan, adibidez, erosketen zerrenda prestatu eta gero, supermerkatura joan behar da (diruaren kudeaketa ere lantzen dugu), eta, ondoren, sukaldaritza tailerretan errezetak prestatzen ditugu.

Horrez gain, komunitatera orientatzeari dagokionez, irteerak programatzen dira, kulturalak zein informatiboak. Gure Unitateko pazienteek aholkularitza edo informazioa bilatu dezakete udalerrian egiten diren ekintzei buruz (adibidez, udal kirolak, kultur jarduerak, NANa berritzea, MUGI txartela, etab.), eta hor, paziente horientzat ingurunea aldatzeak dakarren bizipen positiboaz gain, garraio publikoa edo ospitalez kanpoko ingurunera hurbiltzea eta egoki erabiltzea bultzatzen da baita ere. Ohiko irteerak izaten dira Eroski supermerkatura joatea, hainbat erakunde publikotara hurbiltzea, esaterako, udaletxera –BAZ, Bezeroen Arreta Zerbitzura eta abarretara–, udal liburutegira, bertan aprobetxatzen dugularik irakurtzeko zaletasuna sustatzeko eta informatikaren erabilera bultzatzeko… Horrenbestez, EEUtik aisialdia eta denbora librea egoki erabiltzea sustatzen dugu.

Erakusketa oso berezia

Programatu genuen azken irteera Arrasateko Kalte Zerebraleko Eguneko Zentroko erabiltzaileek egindako ‘Jolasa, kolorea eta buztina’ erakusketara izan zen. Helburua: aisialdia eta trebetasun instrumentalak lantzea. Oso asebetegarria izan zen parte hartu zuten pazienteentzat, aisialdiko irteera baten bitartez, dirua kudeatzeak eta garraio publikoa erabiltzeak dakarren autonomia ere bultzatu baitzen.

Halaber, osasun mentaleko arazoak dituzten gure pazienteek, kalte zerebralaren ondorioz lagun artistek dituzten mugak ezagutzen dituztelarik, harridura eta miresmen handia erakutsi zuten haien lanak ikustean, eta oso positibo baloratu zuten egileek egindako ahaleginaren emaitza. “Harrituta geratu ginen haiek egindako marabillak ikusita, obra bakoitza zehatz-mehatz ikusi genuen, eta bakoitzak ikusten genuena eta gustatzen zitzaiguna aipatzen genuen.  Azkenean, jolas bat egin genuen, eta gehien gustatu zitzaiguna bozkatu genuen (eta asko izan ziren, izan ere)”. Hori erakusketaren ondoren taldean entzun ziren komentarioetako bat da.