Ospitalarioak Fundazioa Euskadiko boluntario-ek esperientziak eta ezagutzak partekatu dituzte Boluntariotza Ospitalarioko IV. Kongresuan
Arrasateko eta Durangoko zazpi boluntariok Granadan egindako topaketan parte hartu dute. Kongresuak Fundación Hospitalariaseko 100 boluntario baino gehiago bildu ditu, laguntzaren, prestakuntzaren eta pertsonenganako konpromisoaren garrantziaz hausnartzeko.
Ospitalarioak Fundazioa Euskadiko Arrasateko eta Durangoko zentroetako zazpi boluntariok parte hartu dute urriaren 16tik 18ra Granadan egin den Fundación Hospitalariasen Boluntariotza Ospitalarioko IV. Kongresuan. Aurtengo topaketaren leloa «Zure presentziak bizitzak aldatzen ditu. Baita zurea ere» izan da.
Euskadiko ordezkariekin batera izan dira Egoitz Zabala, Boluntariotzako koordinatzailea, eta Amaia Segovia, Terapia Okupazionaleko arduraduna.
Kongresuak Fundación Hospitalariasen hainbat zentrotako 100 boluntario baino gehiago bildu ditu, prestakuntzarako, esperientziak trukatzeko eta artatzen diren pertsonei laguntzeko boluntariotzak duen eginkizunaz hausnartzeko.
Laguntzea denbora eskaintzea baino askoz gehiago da
Boluntariotza Ospitalarioak Fundazioa Euskadin zaintzak ulertzeko dugun moduaren parte da. Bere ekarpena jardueretan laguntzetik harago doa: denbora, entzutea eta presentzia eskaintzea da; pertsonen arteko loturak sortzea eta inor bakarrik senti ez dadin laguntzea.
Giza dimentsio horrek garrantzi berezia du laguntza-beharrak dituzten pertsonen arretan. Izan ere, harreman pertsonalak, parte-hartzea eta beste pertsonekin loturak izatea funtsezkoak dira haien ongizaterako eta bizi-kalitaterako.
Kongresuaren leloak, «Zure presentziak bizitzak aldatzen ditu. Baita zurea ere», topaketaren balioa nabarmendu du, baita laguntzen duen pertsonaren eta laguntza jasotzen duenaren arteko harremanak bientzat izan dezakeen eragin aberasgarria ere.
Inaugurazioan, Luz Divina Sánchez ahizpak, Fundación Hospitalariasen presidenteak, boluntariotzaren ahalmen eraldatzailea azpimarratu zuen:
«Pertsonekin topo egiteak eraldatu egiten gaitu. Haien istorioek, zailtasunek, konfiantzak eta haiekin partekatzen dugun guztiak gure begirada eta bizitzaren aurrean kokatzeko modua ere hezten dituzte».
Prestakuntza, hobeto laguntzeko tresna
Kongresuaren ardatz nagusietako bat boluntarioen prestakuntza izan da. Horretarako, eguneroko laguntza-lanean aurki ditzaketen egoerei buruzko tailerrak eta hausnarketarako guneak antolatu dira.
Besteak beste, honako gai hauek landu dira: boluntariotzaren erronka etikoak, bizitzaren amaierako eta bakardade-egoeretako laguntza, adinkeriaren aurkako borroka eta osasun mentaleko arazoak dituzten gazteei ematen zaien babesa.
Jardunaldiek aukera eman dute, halaber, zentro desberdinetako boluntarioen artean esperientziak partekatzeko, laguntzeko beste modu batzuk ezagutzeko eta Fundación Hospitalariasen sareko harremanak sendotzeko.
Kongresuaren barruan, Granadako ibilbide bat ere egin da, Hospitalitatearen jatorriarekin eta San Joan Jainkoarenaren, San Benito Menniren, María Josefa Recioren eta María Angustias Giménezen ondarearekin lotutako lekuak ezagutzeko.
Laguntzen duten pertsonak ere zaindu behar dira
Topaketak agerian utzi du boluntarioei prestakuntza, babesa eta aitortza eskaintzearen garrantzia. Izan ere, beste pertsona batzuei beren denboraren zati bat eskaintzen dietenek ere laguntza eta zaintza behar dituzte.
Inaugurazioan, Alejandro Floritek, Fundación Hospitalariasen Identitate Ospitalarioko zuzendari korporatiboak, ideia hori nabarmendu zuen:
«Hospitalitateak laguntzen duten pertsonak zaintzea ere esan nahi du».
Ildo horretan, kongresuan 25 urtetik gorako ibilbidea duten boluntarioei aitortza egiteko ekitaldia egin zen, urteetan zehar erakutsitako konpromisoa, jarraitutasuna eta sortutako harremanak balioan jartzeko.
Gaur egun, Fundación Hospitalariasek 1.300 boluntario baino gehiago ditu bere zentroetan. Haien denborak eta konpromisoak Hospitalitatea egunerokoan modu hurbil, solidario eta gizatiarrean gauzatzen laguntzen dute.
Granadatik Arrasatera eta Durangora: loturak sendotzen jarraitzeko
Ospitalarioak Fundazioa Euskadirentzat, kongresuan parte hartzea aukera bat izan da gure zentroetako boluntariotza indartzeko eta laguntza-lan bera egiten duten beste pertsona batzuekin ezagutzak eta esperientziak partekatzeko.
Granadan bizitakoak gogorarazi digu laguntzeko ez direla beti ekintza handiak behar. Batzuetan, entzuteak, hitz egiteak, jarduera bat partekatzeak edo beste pertsona bati denbora eskaintzeak alde handia eragin dezake haren egunerokoan.
Izan ere, boluntariotzak denbora eskaintzen du. Baina, batez ere, presentzia. Eta presentzia hori pertsonak eta haien arteko harremanak erdigunean jartzen dituzten zaintzen funtsezko parte da.
