Donostiako gotzainak meza eman zuen gure elizan, Jubileuko Urtea gure pazienteekin ospatzeko

“Itxaropenaren erromesak” da Jubileuko Urte honetako leloa. Eliza Katolikoak 25 urtean behin ospatzen du urte berezi hau, eta fededunak adiskidetzera eta espiritualki berritzera gonbidatzen ditu orduan. Graziazko aldi hau inauguratzeko, Frantzisko aita santuak Ate Santua ireki zuen Erroman, Jainkoaren errukira irekitzeko unea sinbolizatzen duen ekitaldi gisa. Erromako aita santuen basilikez gain, tenplu askok euren Ate Santuak irekitzen dituzte Jubileuko grazia tokian-tokian bizi ahal izateko.

Jubileu garai honetako mezua helarazteko, Fernando Prado monsinorea, Donostiako gotzaina, joan dan hilaren 18an Ospitalarioak Fundazioa Euskadik eta San Joan Jainkoarenaren Anaiek Arrasaten dituzten ospitaleetara hurbildu zen, eta bertan meza eman zuen gure elizan, San Joan Jainkoarenaren lorategietan hasitako prozesio baten ondoren. Homilian, gotzaina pertsona ahulenengana hurbildu zen eta haien ondoan egon zen, eta itxaropenaren erromesen papera azpimarratu zuen, elkartasunezko keinu bakoitzarekin itxaropen haziak ereiten dituztela eta gizarte gizatiarrago bat eraikitzen laguntzen dutela esanez.

Egun zirraragarria

Oso ekitaldi hunkigarria izan zen, ekitaldian gure pazienteek margotutako gurutzea bedeinkatu ere bedeinkatu zen eta.

“Elizbarrutiak ekitaldi hau gure ospitaleetan egin nahi zuen”, halaxe adierazi zigun Egoitz Zabalak, Ospitalarioak Fundazioa Euskadiko Ospitale Nortasuneko arduradunak. “Eta oso pozgarria izan da; guretzat, ospakizun honek esan nahi du handiagoa den zerbaiten parte garela: Eliza unibertsalaren parte garela. San Joan Jainkoarenaren Anaiekin batera egin genuen ekitaldia, errealitate bera bizi dugulako. Eliza garrantzi handia ematen ari da elkarrekin ibiltzeari, beste batzuekin ibiltzeari”, azaldu zuen.

Gaixoak, langileak, Ahizpa Ospitalarioen komunitateko ahizpak eta San Joan Jainkoarenaren ordenako anaiak, Arrasate, Bergara, Villabona, Berastegiko eta beste udalerri batzuetako fededunak, elizbarrutiko Osasun Pastoraltzako eta Espetxe Pastoraltzako kideak, gure ospitaleko, Gipuzkoako Lourdeseko Hospitalitateko eta Loiolaetxeko boluntarioak… horiek denek bete zuten gure eliza. Meza Elizbarrutiko apaiz askok elkarrekin  eman zuten, eta bertan egon ziren, halaber, Ospitalarioak Fundazioa Euskadi eta Gipuzkoako San Joan Jainkoarenaren zentroetako zuzendaritza kontseiluak, Marisa Merino eta Arantxa Picon, zentroetako zuzendari gerenteak, buruan zirela.