Bizkaiko ahaldu nagusiak Ospitalarioak Fundazioa Euskadik kudeatzen duen Monte Avril zentro berria bisitatu du
Bizkaiko ahaldun nagusiak, Elixabete Etxanobek, Bilbon Aldundiak iaz erositako Monte Avril zentroko plaza berrien erabiltzaileak bisitatu ditu. Ospitalarioak Fundazioa Euskadik zentroa kudeatzen du.
Baliabide hau irekitzeari esker desgaitasun intelektuala eta gaixotasun mentala duten pertsonentzako 50 egoitza-plaza berri sortu dira, kolektibo horientzako eta haien familientzako babes- eta zainketa-sarea indartuz. Horrela Bizkaiko Foru Aldundiak zerbitzuei dagokienez lurraldean baliabideen lurralde-oreka lortzeko bidean aurrera egiten jarraitzen du.
Aldundiak Sagrado Corazón de Jesús – Jesusen Bihotza ongintzako erakundeari erositako eraikina bi egoitza-unitate desberdin hartzeko egokitu da: bata gaixotasun mentala duten 22 pertsonarentzat eta bestea desgaitasun intelektuala duten 28 pertsonarentzat. Plazak era mailakatuan bete dira.
Amaia Antxustegi Gizarte Ekintzako foru diputatua, sor Luz Divina Sánchez Ospitalarioak Fundazioaren Patronatuko presidentea eta Alberto Martín de la Mata Fundazioaren zuzendari ahaldun nagusiarekin izan dira bisitan. Ospitalarioak Fundazioa Euskadiren izenean, Marisa Merino zuzendari gerentea, José Luis Girón asistentzia-zuzendaria, Aloña Telleria Zerbitzu Orokorretako zuzendaria eta Mertxe Sagarna Monte Avril zentroko zuzendaria izan dira ere bai.
Elixabete Etxanobek azpimarratu du Avril Mendiko egoitza foru sarean sartzea erabaki estrategikoa dela baliabideak handitzeko. Gogorarazi du Aldundiak laguntza behar duten pertsonen profilei erantzuteko zentroak ireki eta egokitzen dituela, “betiere erosotasun handiagoa, kalitatezko arreta eta familiei lasaitasuna eskaintzeko helburuarekin, zaintza eredu pertsonalizatuago eta komunitarioago baterantz aurrera eginez”.
Avril Mendiko zentroaren funtzionamenduak urtean 3 milioi eurotik gorako inbertsioa ekarriko dio Bizkaiko Foru Aldundiari. Irekierak 40 lanpostu berri sortzea ekarri du, arreta zuzenekoak zein zeharkakoak.
Irekiera berri honekin Bizkaiak egoitza-baliabide espezializatuen sarea indartzen du. Aurrekontuari dagokionez Bizkaiko Foru Aldundiak 100 milioi eurotik gora bideratu ditu aurten desgaitasunaren esparrura.
Avril Mendiko plaza berriekin lurraldeak 1.271 plaza ditu okupazio-zentroetan, 1.183 plaza eguneko arretan eta 1.546 egoitza-plaza desgaituentzako eta gaixotasun mentala dutenentzako laguntzak dituzten zentro eta etxebizitzetan.
