Ekaina, ingurumenarekin eta jasangarritasunarekin dugun konpromisoa indartzeko hilabetea

Ekainaren 5ean ospatzen den Ingurumenaren Mundu Eguna dela eta, Ospitalarioak Fundazioa Euskadik (lehen Aita Menni Ahizpa Ospitalarioak) jarduera programazio berezia prestatu du ekainerako, jardunbide jasangarriak eta ingurune naturalarekiko errespetua sustatzeko.

Aurten, 2025ean, NBEk azpimarratzen du plastikoen kutsadura planetako txoko guztietara zabaltzen dela, baita giza gorputzean ere, mikroplastiko gisa. Gure erakundeak naturaren alde lan egiten du eta kutsaduraren ondorioak azpimarratu nahi ditu, ez plastikoen kutsadurarenak bakarrik, eta aldi berean kontsumoa murrizteko, berrerabiltzeko eta birziklatzeko eskatzen digu, etorkizun garbi eta jasangarriago bat eraikitzeko. Jarraian duzue zehaztuta Arrasateko ospitaleko Errehabilitazio eta Dinamizazio Sozialeko gure taldeak, Amaia Segoviak koordinatuta, diseinatu duen programa:

Ekainak 2 – Arrasateko Garbigunera bisita

Paziente talde batek Arrasateko Garbigunera egindako bisita hezitzaile batean parte hartu zuen, eta han birziklatze prozesua bertatik bertara ikusi ahal izan zuten. Zentroko langile batek hondakinak kudeatzeko prozesuari buruzko azalpen zehatzak eman zituen eta, ondoren, bertaratutakoek ikasitako ezagutzak praktikara eraman ahal izan zituzten.

Ekainak 3 – Arte birziklatuaren lehiaketa eta ingurumen zinema

• Arte birziklatuaren lehiaketa: Ospitaleko Unitate guztiek material birziklatuekin egindako artelanak aurkeztu zituzten, eta artelan horiek atari nagusian erakutsi ziren. Epaimahaiak, mantentze lanetako lantaldeko kideek osatuta zegoenak, botikinerako planta batekin, pazienteentzako askari berezi batekin eta oroigarri diploma batekin saritu zuen Unitate irabazlea.
• Ingurumen zinemaren proiekzioa: «Wall-E (Garbiketa Batailoia)» filma proiektatu zen. Gure kontsumo ohiturek planetaren osasunean duten eraginari buruz hausnartzera gonbidatzen duen animazio istorio bat da filma. Esperientzia hezitzaile eta entretenigarria, bertaratutako publikoak oso positiboki baloratu zuena.

Ekainak 5 – Ginkana Ingurumenaren Mundu Egunaren alde

Ingurumenaren Mundu Eguna ospatzeko, ginkana bat antolatu da ospitaleko patio orokorrean, Unitate guztien partaidetzarekin. Jardueren barruan hauek daude:

• «Lokotsak» birziklatze lasterketa, non ekipoak material birziklatuak erabiliz eta hondakinak dagozkien edukiontzietan behar bezala sailkatuz lehiatuko diren.
• Bingo ekologikoa taldeka, jardunbide jasangarrien inguruko ikaskuntza sustatzen duen joko interaktiboa.
• Ingurumenari buruzko tribiala, Ingurumenarekin lotutako galderekin, ezagutza eta gogoeta sustatzeko.
• Zumba saioa: jarduera fisikoa abestien erritmoan, esaterako, Chayannen “Madre Tierra” abestiaren erritmoan, osasuna eta naturarekiko lotura sustatzeko.

Ekainak 7 – Lore landaketa

Pazienteek eta profesionalek ospitaleko patio orokorreko lorategietan loreak landatzen lagunduko dute, ingurua edertzeko eta espazio komuna zaintzen aktiboki parte hartzea sustatzeko.

Ekainak 10 – Ginkana Ozeanoen Mundu Egunaren alde

«Avatar: Uraren zentzua» filma emango da. Filmaren argudioak itsas ekosistemen kontserbazioa eta oreka naturalaren defentsa balioesten ditu.

Konpromisoa urte osoan

Aipatutako ekintzez gain, ingurumen kontzientziaziorako kartelak jarri dira ospitale barruko leku estrategikoetan. Informazio material horien asmoa da ospitale komunitateko kide guztien artean jasangarritasun eta erantzukizun ekologikoaren mezua indartzea.

Urteko programaren barruan sartzen dira, halaber, urtarrilean haziak landatzea eta irailaren 20an, larunbatean, azoka jasangarri bat egitea.

Kontzientziazioa sustatzeko eta ingurumena kontserbatzera bideratutako ekintzak abian jartzeko, kanpoko erakunde lokalekin lankidetzan aritzen gara, hala nola CIMASUBekin, edo gure pazienteak beren instalazioetan hartzen dituzten beste batzuekin, ingurumen inpaktua ikusarazteko eta inpaktu hori saihesteko alternatibak erakusteko.

Aipatu behar da, halaber, Unitate bakoitzak gai zehatz hauetako bat lantzen duela hilero:

• birziklapenaren gaineko kontzientziazioa
• ingurune natural hurbilena ezagutzea
• ehunen kontsumoa eta hondakinak
• biodibertsitatearen eta ozeanoen kontserbazioa
• mugikortasun jasangarria
• deforestazioa

Ospitalarioak Fundazioa Euskadin uste dugu planeta zaintzea pertsonak zaintzeko modu bat ere badela; bakoitzaren parte hartzea funtsezkoa dela mundu berde eta jasangarriago bat errealitate bihurtzeko. Horregatik, etorkizun berdeago eta gizatiarrago bat eraikitzen lagunduko diguten programak eta materialak lantzen jarraitzen dugu.