Joan den urriaren 14an, Ospitalarioak Fundazioa Euskadiko talde bat Madrilera joan zen, Jubileu Urtearen barruan erromesaldi garrantzitsua den Jubileu Ospitalarioan parte hartzera. Ekitaldiak berrehun pertsona inguru bildu zituen: pazienteak, Ahizpa Ospitalarioen komunitateko ahizpak, San Joan Jainkoarenaren anaiak, boluntario laikoak eta Ospitalarioak Fundazioko zentro guztietatik iritsitako langileak.
“Itxaropen erromesak” lelopean, ospakizun nagusia Madrilgo Almudena Katedralean egin zen, Madrilgo artzapezpiku Jose Cobo kardinala buru zela. Eliza barruko figura nabarmena da Cobo kardinala, eta duela 11 urte gure ospitalea bisitatu zuen, gazte talde batekin batera. Harrezkero, harreman hurbila izan du gure komunitatearekin, eta horregatik bereziki esanguratsua izan zen bere presentzia eta gure parte hartzea ospakizun honetan.
Elizkizunean Alberto Martin Ospitalarioak Fundazioko zuzendari nagusia eta Maria Rosario Iranzo Probintziako kontseilaria ere izan ziren, eta azken horrek bertan zeudenei dei egin zien «bihotz samariarra beti erne edukitzeko, gehien behar duenaren bila irteteko».
“Euskaditik ordezkaritza handia izan genuen: 18 paziente, ahizpa Rosario Añorberekin eta lau laguntzailerekin batera. Denok emozioz bizi genuen jardunaldia, egunak itxaropenetik abiatuta besteen zerbitzura elkarrekin ibiltzearen balioa gogorarazi baitzigun”, Egoitz Zabala Pastoraltza, Arreta Erlijioso eta Espiritualeko Zerbitzuko koordinatzaileak esan digunez.
Zeremoniaren ondoren, taldea Ciempozuelosera joan zen, Ahizpa Ospitalarioen ama etxera, han baitaude betiko atseden hartuta Maria Josefa Recio eta Maria Angustias Gimenez ahizpa fundatzaileak. Bertan, Espainiako Ospitalarioak Fundazioko zentroetatik etorritako gainerako erromesekin batera, jai eta otoitz egun bat ospatu zen, senidetasun bazkariarekin amaitu zena.
“Fundatzaileen herentzia ospitalarioa eta espiritua oso bizirik sentitu genituen gertaera izan zen”, nabarmendu zuen gure Pastoraltzako koordinatzaileak.
