Itsasoan lehen aldiz bainatzearen poza
Tenperatura altuak aprobetxatuz, ekainaren 12an eta 17an, Ospitalarioak Fundazioa Euskadik kudeatzen duen Orozkoko Ibarra Zentroko egoiliar talde batek Gorlizko eta Plentziako hondartzetarako bi irteeratan parte hartu zuen.
Zentroko lantaldeak antolatutako jarduerak “lagundutako bainuaren” zerbitzuaren laguntza izan zuen: Bizkaiko Foru Aldundiak lurraldeko zortzi hondartzatan eskaintzen duen zerbitzu bat da, mugikortasun urriko pertsonak itsasoan segurtasun osoz bainatu ahal izatea ahalbidetzen duena, irisgarritasun elementuei esker, horien artean hurbiltzeko aulkiak, garabiak, taka-takak, makuluak edo txalekoak. Zerbitzuak langile espezializatuen laguntza ere eskaintzen du.
Hondartzako ekintza horiek, beroari aurre egiteko arnasa eskaintzeaz gain, poz handiko uneak ere izan ziren parte hartu zuten erabiltzaileentzat. Horietako batzuentzat hondartza zapaldu edo itsasoko uretan sartzen ziren lehen aldia zen, eta horrek esperientzia benetan aparta bihurtu zuen.
Iazko hasieran adimen urritasuna duten emakumeentzako Orozkoko “Jesus-Maria” zentro zaharraren kudeaketa bere gain hartu ondoren, Ospitalarioak Fundazioa Euskadik konpromisoa hartu zuen erabiltzaileei ongizate maila handiagoak emateko eta haien gizarteratzea bultzatzeko, eta horretarako erabiltzen ari diren aukeren artean aisialdi eta denbora libreko jarduerak antolatzea dago, komunitatearekin eta naturarekin harremanetan.
