Bizkaiko Foru Aldundiaren Jauregia bisitatu dugu
Joan den uztailaren 2an, Txurdinagabarri Egoitzako egoiliar talde batek bisita gidatu batean parte hartu zuen Bizkaiko Foru Aldundiaren Foru Jauregian, eraikin enblematikoaren 125. urteurrena zela eta. Jarduera foru erakundeak bere egoitza nagusian, Bilboko Zabalgunearen bihotzean, mende bat baino gehiagoko historia duela ospatzeko bultzatutako ospakizunen barruan kokatzen da.
Bisitaldian, parte hartzaileek eraikineko espaziorik esanguratsuenak ezagutzeko aukera izan zuten, eta bertako arkitektura eta ondare artistiko baliotsua miresteko. Erdiko eskalinata, areto instituzionalak, dekorazioko beirateak eta euskal erretratu eta artelan bilduma zabala izan ziren interesik gehien piztu zuten elementuetako batzuk.
Eraikina 1891n proiektatu zuen Luis Aladren Mendivil arkitektoak, azken Gerra Karlistarekin Foruak indargabetu ondoren, orduko Bizkaiko Diputazio Probintziala hartzeko. Gainera, Bilboko zabalgune berrian eraikitako lehen eraikin publikoa izan zen, lurraldearen instituzionalizazio modernoaren ikur bihurtuta.
Estilo neorrenazentistakoa, Foru Jauregia apaingarri aberatsengatik bereizten da, tartean direlarik marmolak, beirateak, garaiko altzariak eta egur nobleak. Bere harribitxi ezagunenetako bat eskalinata nagusiko beiratea da, 1900ean Antonio Rigalt maisu katalanak egina, Anselmo Guinea margolari bizkaitarraren diseinu batetik abiatuta. Lan horrek –’Bizkaiko Alegoria’ du izenburu– Gernikako Arbolaren mendeko foru lurraldea irudikatzen du, euskal askatasunen ikurra, lurraldeko organo parlamentarioa diren Batzar Nagusiekin batera.
Bisita, ikasteko aukera izateaz gain, topaketa eta trukerako gune ere izan zen, eta Bilboko erdiguneari lotutako inpresioak, bitxikeriak eta oroitzapenak partekatu ziren.
